*شكون انا ؟!
ليديا طالبة طب
متحصلة على باك 2021 بمعدل 16,55 دراسة شهرين فقط
نقاط الفصول كارثية / معدل الباك التجريبي: 9
*كيفاش كانت البداية ؟!
ولا كيفاه قررتي تبداي اكثر سؤال يطرح عليا واجابتي باختصار كيما اي طالب يجيه تأنيب ضمير كيما اي طالب في عام الباك يكون مزال اصلا مابداش ومايعرف والو وعندو تخوف من انو مايوصلش وتقدرو تقولو بلي اكثر حاجة دفعتني اني نغير الوضع هذا اني كان عندي خوف كبير من اني نضيع عام من حياتي (حقا انا عندي فوبيا من تقدم الوقت ومن اني نضيعو ولا نخسر عام من حياتي و حاليا بديت نتخلص من هاذ الفوبيا)
وكملاحظة اكبر عامل في نجاحي وتفوقي بعد ربي سبحانو شخصيتي وايماني بنفسي وقدراتي و بلي انا مميزة وراح نوصل اذا حبيت
البداية اكيد ماكنتش ساهلة بصح راح نحاول نلخصلكم *اهم الخطوات لي درتهم :
_كتابة المقرر من اهم الخطوات ولي فرقتلي وتقدرو تقولي اي بغا بداية صحيحة وبغا يوصل مايقدرش يستغنى عليها
_البرنامج بعد كامل البرامج الفاشلة لي درتها نقدر نقولكم بلي سر تصميم البرنامج والاستمرارية عليها هوا انو يكون منطقي ماتصلحش دير برنامج فيه 200 مهمة وتسنى تنفذهم ولا برنامج فيه 20 ساعة
_التركيز على المواد لي معاملاتها كبيرة
_التركيز على المواد لي ضعيفة فيهم مثال انا فيزياء كنت ندي فيها 2 في الباك ديت 18.5
_الاستمرارية اهم سبب يخليك توصل مانيش راح نقلكم قريت بدون توقف اكيد لالا كانو ايام نتعب ونكره ونطيش الكراس سيرتو كي كنت نحصل في حل التمارين بصح الحمد الله بالمداومة وليت متمكنة ووصلت لمقولة الستيلو يجري في يدي
_تجاوز الاحباط ،انا بعد ما عقبت الباك التجريبي (باك بلون) كنت متفائلة بنقاط علىى الاقل مقبولة صح كانو عندي نقائص ودرت اخطاء وكانت تركيزي سئ في هذاك الاسبوع كعاد كنت ندير ليالي بيضاء بصح النتيجة صدمتني خاصة في الفيزياء ولقيت نقاط تحت المعدل مالقري توقعاتي كانت العكس وكنت متأكدة من خدمتي + معظم الاساذة ماحطوليش مليح في التقويم دونك المعدل خرج 9 ، مانيش راح نقولكم كنت مليحة ورجعت نقرا بكل عزيمة مع لول فشلت كامل وشعرة فقدت الامل وحبست يومين ولا بصح الحمد الله عودت رجعت وخليت عندي ثقة في قدراتي
*كيفاش قريت كل مادة بذكاء :
_علوم : نحب نصدمكم ونقولكم العلوم من الغباء انك تحل فيها بزاف تمارين باش تكتاسب افكار ، العلوم اساسها فهم الدرس والمنهجية برك والتمارين تتحل باش توظف المنهجية وتتمكن منها ميش باش تسنى انو فكرة التمرين تتعاود ولي يكون فاهم الدرس وراح يخرج بكل بساطة فكرة التمرين (ودرت ريل عليها في حسابي للناس المهتمة )
_فيزياء: فهم الدرس + ملخص فيه كلش والقوانين والبراهين والتعريفات واضحة + حل تمارين بأفكار متنوعة وفيزياء الافكار يتعاودو عادي جدا وابداو ديما بلي باك باش تحددوا مستواكم الحقيقي
_رياضيات : من اقرب المواد لقلبي واساسها فهم الدرس مع ملخص شامل (تلقاو ملخص شامل ليها في حسابي) وحل تمارين تقريبا كيما الفيزياء
_اجتماعيات: لازم تعرف المنهجية كي تعرفها راح تعرف وش تحفظ مثال بزاف منكم يحفظو تواريخ ميلاد ووفاة الشخصيات على الرغم انهم ماعليهم حتى نقطة + كاين تقنيات تعاونكم بزاف على انكم متنساوش وش قريتو (تلقاوها في حسابي) نحب ثاني نأكد بلي افهمو اكثر مما تحفظو
_فلسفة: باين مكمش راح تقراو كلش عندكم المنهجية + المقترحات برك بالنسبة ضرك للمقترحات وتقنيات الحفظ (تلقاوها في حسابي)
_شريعة: المفروض ماكانش شخص على درب التبانة عندو فيها مشكل ومافيها حتى ابداع احفظ برك
_الادب العربي: اسهل مايكون اقراو الشعر مع المقال ركزوا على الخصائص والتعريفات + الاعرابات المتكررة تقدرو تشوفو المراجعة النهائية تاع خالد حماش تلقاو ملخص شامل انا لي درتو فيها في حسابي
_فرنسية + انجليزية : لي ماجربش تقنية الكراس راهو راطا بزاف تقنية ترفع مستواك وتخليك تولي تفهم النص بشكل جيد وحلو فيهم البكالوريات برك
فرنسية : ركزوا على compte rendu واقراو جميع ملخصات الوحدات تلقاوها في قناة bac dz
انجليزية : ركزوا على القواعد مليح مليح و اتعلمو تكتبو فقرة ميش تحفظوها الدروس كامل تاعها تلقاوهم في قناة bac dz
ممكن ثاني تشوفو منصوري وناصري ومنير شبوة
إرسال تعليق